ផ្លែហ្គឹកជាដំណាំផ្ដល់ប្រាក់ចំណូលខ្ពស់

             លោកថាច់ស៊ុង នៅភូមិលេខ ២ ឃុំផុងភូ ស្រុកកូវកែបានឲ្យដឹងថា៖ គ្រួសារខ្ញុំមានដីស្រែកែប្រែឡើងជាចម្ការដូងបាន ០២ កុង។ ក្នុងរយៈពេល ០៣ ឆ្នាំដំបូង គ្រួសារឆ្លៀតដាំហ្គឹកបាន ៦០ ទង។ បច្ចុប្បន្ននេះ ក្នុងមួយខែៗ គ្រួសារខ្ញុំប្រមូលផលបាន ០៤ លើក ក្នុងមួយលើកៗគិតជាមធ្យមប្រមូលផលបានពី ១០០ - ១២០ គីឡូក្រាម ហើយលក់ជាមួយតម្លៃក្នុងមួយគីឡូក្រាម ៩.០០០ដុង ។ អាស្រ័យការដាំហ្គឹក ចំណាយតែដើមទុនដំបូងសម្រាប់ធ្វើទ្រើង (ពី ០៦ - ០៧ លានដុងក្នុង ០១ កុង) រយៈពេលទទួលផល ០៥ ឆ្នាំ ហើយក្នុងមួយឆ្នាំលោកថាច់ស៊ុងប្រមូលប្រាក់បានជាង ២៥ លានដុង។

លោកថាច់ស៊ុង កំពុងជួសជុលឡើងវិញទ្រើងហ្គឹក។ រូបថត៖ ហ៊ឺវហ្វេ

            បច្ចុប្បន្ន  ហ្គឹកបានដាំច្រើននៅបណ្ដាឃុំ៖ ផុងភូ ហ្វាអឹង ហ្វាតឹង (កូវកែ) ឃុំបិញភូ ភឿងថាញ់ (កាងឡុង) និងនៅឃុំ​មួយចំនួន​នៃ​ស្រុក​ចូវថាញ់ និង​កូវង៉ាង ជាមួយ​ផ្ទៃដី​ជិត​ ៦០ ​ហិ​កតា​។ ក្នុង​នោះ​ ច្រើនបំផុតនៅ​ស្រុកកូវកែ​ជិត ៤៥ ហិកតា។

            តាមថ្នាក់ដឹកនាំការិយាល័យកសិកម្ម និងអភិវឌ្ឍន៍ជនបទស្រុកកូវកែ៖ ឆ្លងតាមរយៈគម្រោងការ "ឧប្ថម្ភពង្រីកការដាំហ្គឹក និងឆ្លាស់ ជីរណារក្រោមទ្រើងហ្គឹកតាមទិសដៅកសិកម្មស្អាត ភ្ជាប់ជាមួយនឹងកន្សោមតម្លៃ ភ្ជាប់ការផលិតជាមួយនឹងការលក់ផលិតផល" ទ្រង់ទ្រាយអន្តរឃុំ (ឃុំផុងភូ និងហ្វាអឹង) បានវិនិយោគផ្សព្វផ្សាយដាំនៅឆ្នាំ ២០២១។ នេះជាគម្រោងការដើម្បីជួយដល់គ្រួសារ​ដែលមានផ្ទៃដីផលិតស្រូវមិនសូវបានផល មានតម្រូវការបង្វែរមកដំណាំផ្សេងៗ ដើម្បីបង្កើនប្រសិទ្ធភាពផលិត និងបង្កើនប្រភពចំណូល ជាមួយផ្ទៃដី ២០ ហិកតា (ឃុំផុងភូមាន ២៩ គ្រួសារដាំលើផ្ទៃដី ៦,៨ ហិកតា ឃុំហ្វាអឹងមាន ៤៣ គ្រួសារដាំបាន ១៣.២ ហិកតា)។

            តាមប្រសាសន៍របស់លោកឡឺញ៉ឹកត្រឿង ភូមិយ៉ុងឡើង ឃុំហ្វាអឹង ស្រុកកូវកែ​បាន​ឱ្យដឹងថា៖ ដើម្បីដាំហ្គឹកទទួលបានទិន្នផលខ្ពស់ កាត់បន្ថយការបំផ្លាញនៃ​សត្វ​ល្អិត។ល។អ្នកដាំ ត្រូវធ្វើអនាម័យទ្រើងហ្គឹក និងវិនិច្ឆ័យឲ្យអស់ផ្លែដែលខូចជ្រុះ។ ចំពោះបង្គោលធ្វើទ្រើងឲ្យហ្គឹកត្រូវរឹងមាំ (អាចប្រើសសរថ្មឬសសរបេតុង) មិនគប្បី​ប្រើប្រាស់បង្គោលឫស្សី ពីព្រោះក្នុងដំណាក់កាលនៃការលូតលាស់របស់ហ្គឹក និង​ផ្លែវានឹងធ្វើឲ្យទ្រើងងាយបាក់រលំឬទ្រេត។ល។ ទិន្នផលគិតជាមធ្យមចំពោះផ្ទៃដី​សម្រាប់ដាំតែហ្គឹកមួយមុខ (កម្រិតដាំពី ១.០០០ - ១.២០០ គល់ក្នុងមួយហិកតា) អាចផ្ដល់ផលបានពី ៣០-៣៥ តោនក្នុងមួយហិកតាក្នុងមួយឆ្នាំ។ ចំពោះផ្ទៃដីដាំឆ្លាស់ជាមួយដំណាំផ្សេង (ពី ៤៥០ - ៥០០ គល់ក្នុងមួយហិកតា) អាចប្រមូលផលបានពី១៥ - ១៧ តោនក្នុងមួយហិកតា ក្នុង​នោះ ​ប្រាក់ចំណាយសម្រាប់ទិញថ្នាំការពាររុក្ខជាតិ និង​ជី​​ប្រមាណ ០៥% នៃ​ប្រាក់ចំណូល​រួម។

ឈ្មួញប្រមូលទិញផ្លែហ្គឹក។ រូបថត៖ ហ៊ឺវហ្វេ

            បានដឹងថា បច្ចុប្បន្ននេះ ផ្លែហ្គឹកនៅតំបន់ស្រុកកូវកែបានប្រមូលទិញច្រើនតាមរយៈក្រុមហ៊ុនឯកជនទំនួលខុសត្រូវមានកំណត់ពាណិជ្ជកម្ម‑សេវាកម្មទ្រុកឡាង (កឹងធើ) និងសហករណ៍កសិកម្មវៀតថាញ់ (ឃុំហ្វាអឹង ស្រុកកូវកែ)។

            និយាយអំពីទម្រង់ចងសម្ព័ន្ធក្នុងការផលិតសម្រាប់ប្រជាជននៅលើភូមិសាស្រ្តឃុំលោកគាងតាំ នាយកបញ្ជាការសហករណ៍កសិកម្មវៀតថាញ់មានប្រសាសន៍ថា៖ក្រៅពីគម្រោងការ ឧប្ថម្ភពង្រីកការដាំហ្គឹកដែលអនុវត្តដោយការិយាល័យកសិកម្មនិងអភិវឌ្ឍន៍ជនបទស្រុកនៅឆ្នាំ ២០២១ កាលពីឆ្នាំ ២០១៩ សហករណ៍ក៏បានចូលរួមតាមរយៈការឧប្ថម្ភគម្រោងការសម្របសម្រួលនឹងការប្រែប្រួលនៃធាតុអាកាសនៅតំបន់វាលរាបទន្លេគឺវឡុង ខេត្តត្រាវិញ (AMD ត្រាវិញ) បានវិនិយោគទុនឲ្យ ១០០ គ្រួសារដាំ ២០ ហិកតា។ដូច្នេះហើយ បច្ចុប្បន្ននេះ នៅឃុំហ្វាអឹងមានផ្ទៃដីដាំហ្គឹក  ៣៥ ហិកតា ហើយបានសហករណ៍ប្រមូលទិញ គិតជាមធ្យមក្នុងមួយខែៗ ទិញផ្លែហ្គឹកពី ០៧-០៨ តោន។ ជាមួយនឹងតម្លៃហ្គឹកបច្ចុប្បន្ន ក្នុងមួយឆ្នាំៗ មាមីងកសិករដាំហ្គឹកទទួលបានប្រាក់ចំណូលពី ២០០-២៥០ លានដុងក្នុងមួយហិកតា៕

ប្រែសម្រួល៖ សុខា