មាមីងកសិករខេត្តត្រាវិញប្រមូលផលកក់រដូវសម្រក

             បច្ចុប្បន្ន មាមីងកសិករកំពុងឈានចូលរដូវប្រមូលផលកក់រដូវសម្រកឆ្នាំ ២០២២‑២០២៣ ដោយកក់អំណោយផល និងលក់បានតម្លៃខ្ពស់។ ជាក់ស្តែងគឺកក់ប្រភេទលេខ ១ ប្រវែង ២ ម៉ែត្រលក់បាន ២៧.០០០​ ដុងក្នុងមួយគីឡូក្រាម ប្រភេទលេខ ២ ប្រវែង ១,២​ ម៉ែត្រ លក់ជាមួយតម្លៃ ២១.០០០ ដុងក្នុងមួយគីឡូក្រាម និងប្រភេទលេខ ៣ ប្រវែង ១,៤​ ម៉ែត្រ លក់បាន ១៤.០០០ ដុងក្នុងមួយគីឡូក្រាម។ តម្លៃកក់កើនឡើងពី ៣.០០០‑៤.០០០ ដុងក្នុងមួយគីឡូក្រាម បើប្រៀបជាមួយរដូវសម្រកឆ្នាំកន្លង ទិន្នផលកក់ក៏ខ្ពស់ជាងពី ០១ ‑០២ តោនក្នុងមួយហិកតា បរិមាណផលសម្រេច ០៩-១១ តោនក្នុងមួយហិកតា ទើបរដូវកក់ឆ្នាំនេះមាមីងកសិករទទួលបានប្រាក់ចំណេញពី ១០០-១២០ លានដុងក្នុងមួយហិកតា។

            គ្រួសារលោកពូង្វៀងវ៉ាំងតឹង នៅឃុំឌឹកម៉ី (ស្រុកកាងឡុង) កំពុងប្រមូលផលកក់ ១,១ ហិកតា ទិន្នផលជាង ១២ តោនក្នុងមួយហិកតា ក្នុងនោះមានកក់ប្រភេទលេខ ១ ចំនួន ១០ តោន និងកក់ប្រភេទលេខ ៣ ជាង ០២ តោន ។ ក្រោយពេលទូទាត់ប្រាក់ចំណាយរួចស្រេច ពូទទួលបានប្រាក់ចំណេញប្រមាណ ១០០ លានដុងក្នុងមួយហិកតា ខ្ពស់ជាងច្រើនដងបើប្រៀបជាមួយការផលិតស្រូវ។

កសិករប្រមូលផលកក់។ រូបថត៖ ថាញ់ហ្វា

            តាមប្រសាសន៍របស់លោកង្វៀងវ៉ាំងឡុក ប្រធានគណៈកម្មការភូមិឌឹកម៉ី (ឃុំឌឹកម៉ី ស្រុកកាងឡុង) ភូមិមានប្រជាជនជាង ៣០០ គ្រួសារ មុននោះភាគច្រើនប្រកបរបរផលិតស្រូវ ប៉ុន្តែអាស្រ័យដីនៅតំបន់នេះត្រូវជ្រាបជាតិជូរប្រៃ ម៉្លោះហើយទិន្នផលស្រូវបានតែពី ៣-៤ តោនក្នុងមួយហិកតា ប្រាក់ចំណេញបានតែពី ១០-២០​ លានដុង។ រយៈកាលជិត ១០ ឆ្នាំមកនេះ ប្រជាជននៅក្នុងភូមិចាប់ផ្តើមបង្វែរផ្ទៃដីផលិតស្រូវមិនសូវមានផលមកដាំកក់ ម៉្លោះហើយជីវភាពរបស់ប្រជាជនបានលើកកម្ពស់។ គិតមកដល់បច្ចុប្បន្នមានគ្រួសារជាង ២០០​ គ្រួជំនាញដាំកក់ ទទួលបានប្រភពចំណូលលំនឹង។ ក្នុងមួយឆ្នាំ ប្រជាជនដាំកក់ ២,៥ រដូវ លក់ជាមួយតម្លៃពី ១៤.០០០‑២៧.០០០ ដុងក្នុងមួយគីឡូក្រាម ក្រោយពេលទូទាត់ប្រាក់ចំណាយរួច ក្នុងមួយឆ្នាំមាមីងចំណេញជាង ២០០ លានដុង ក្នុងមួយហិកតា។

            ក្រៅពីនោះ ដាំកក់នៅទាំងបង្កលក្ខណៈឲ្យពលកររាប់ពាន់នាក់នៅមូលដ្ឋាន តាំងពីការងារប្រមូលផលកក់ ត្បាញកក់វេញកក់ ត្បាញកន្ទេល។ល។ ពលករម្នាក់មានប្រភពចំណូលពី ១៥០.០០០-១៨០.០០០​ដុង ក្នុងមួយថ្ងៃ។

            ឃុំឌឹកម៉ី ស្រុកកាងឡុង ជាភូមិសាស្ត្រមួយឈានមុខក្នុងការកែប្រែផ្ទៃដីផលិតស្រូវ មកដាំកក់ដើម្បីលើកស្ទួយជីវភាពប្រជាជន។ គិតមកដល់បច្ចុប្បន្នទូទាំងឃុំមានផ្ទៃដីដាំកក់ជិត ៥០០ ហិកតា។ អាស្រ័យដោយហ៊ានបង្វែរផ្ទៃដី ជាច្រើនឆ្នាំកន្លង មានប្រជាជនជាង ១០០ គ្រួសារ ដាំកក់​ នៅមូលដ្ឋានមានប្រភពចំណូលលំនឹង និងខ្ពស់ជាងច្រើនដងបើប្រៀបជាមួយការផលិតស្រូវ។

            លោកឡេវ៉ាំងសុង អនុប្រធានគណៈកម្មាធិការប្រជាជនឃុំឌឹកម៉ីឲ្យដឹងថា៖​ ឃុំឌឹកម៉ី មានផ្ទៃដីផលិតកសិកម្មជាង ១.៤២៤​ ហិកតា។ ដីនៅទីនោះ ភាគច្រើនត្រូវជ្រាបជាតិជូរប្រៃ ផលិតស្រូវមិនសូវមានផល។ អនុវត្តគោលការណ៍ ផ្លាស់ប្តូររចនាសម័ន្ធដំណាំ ដើម្បីបង្កើនលទ្ធផល នៅលើផ្ទៃដីតែមួយ ចាប់តាំងពីឆ្នាំ ២០០០ ឃុំចាប់ផ្តើមផ្លាស់ប្តូរការផលិតស្រូវមកដាំកក់។ បច្ចុប្បន្ន កក់ជាមុខទំនិញសំខាន់ ផ្តល់តម្លៃសេដ្ឋកិច្ចខ្ពស់បំផុតសម្រាប់មូលដ្ឋាន។

            ឆ្នាំ ២០២២ តម្លៃផលិតកសិកម្មរបស់ឃុំសម្រេចបានជាង ៣៩៦ ពាន់លានដុង ក្នុងនោះដំណាំកក់ផ្ដល់ឲ្យជិត ៣២៦ ពាន់លានដុង។ រដ្ឋអំណាចមូលដ្ឋាន កំពុងសហការជាមួយផ្នែកមានសមត្ថកិច្ចកសាងពាណិជ្ជសញ្ញា និងណែនាំរបៀបផលិតដើម្បីកក់ឌឹកម៉ីបានបង្កើនតម្លៃ។ មូលដ្ឋាននឹងបន្ត បំផុសចលនា បើកទូលាយផ្ទៃដីដាំកក់ឲ្យសម្រេចបាន ៧៥% នៃផ្ទៃដីកសិកម្មរបស់ឃុំ៕

 ប្រែសម្រួល៖ សុខា