ឃុំហ៊ីវទឺជាមួយចលនាយុវជនកសាងខ្លួន កសាងអាជីព

បងដាំងហ្វាងវ៉ូ អនុលេខាសម្ព័ន្ធយុវជនឃុំហ៊ីវទឺបានឲ្យដឹង៖ បច្ចុប្បន្នក្នុងទូទាំងឃុំមានសមាជិកយុវជន ៩៨​ នាក់ មានសមាជិកសមាគមសហព័ន្ធយុវជន ៥០៤ នាក់ចូលរួមប្រជុំជីវភាព នៅសាខាសម្ព័ន្ធយុវជន ១២ កន្លែង (សាខាសម្ព័ន្ធយុវជនភូមិ​ ០៧ កន្លែង​  សាខាសម្ព័ន្ធយុវជនសាលារៀន និងសាខាសម្ព័ន្ធយុវជនយោ ធា ០៤ កន្លែង)។ នេះជាកងកម្លាំងយុវវ័យតែងរវៀសរវៃ មានគំនិតច្នៃប្រតិដ្ឋ ជឿជាក់លើខ្លួនឯង ហ៊ានគិតហ៊ានធ្វើ មានស្មារតីជម្នះការលំបាក ឈានឡើងកសាងខ្លួន កសាងអាជីព។ តួយ៉ាងដូចជាបង ថាច់ស្វឹង លេខាសាខាសម្ព័ន្ធយុវជនភូមិអូរត្រាវ ក្នុងមួយឆ្នាំទទួលបានប្រភពចំណូលជាង ១០០ លានដុង ពីការចិញ្ចឹមគោមេ និងចិញ្ចឹមទា។ បងស្វឹងឲ្យដឹង៖​ ខ្ញុំចាប់ផ្តើមចិញ្ចឹមគោតាំងពីឆ្នាំ ២០១៦ ដំបូងខ្ញុំទិញគោមេ ០២ ក្បាល (ប្រសិនបើគោមេកើតកូនឈ្មោលនឹងទុកបំប៉នឲ្យធាត់រួចលក់គោសាច់ បើកើតកូនញីល្អទុកសម្រាប់បន្តពូជ)។ ផ្តើមពីគោ ០២ ក្បាល មកដល់បច្ចុប្បន្ននេះគ្រួសារខ្ញុំមានគោមេ ០៦ ក្បាល។ ដើមឆ្នាំ ២០២១ ខ្ញុំចាប់ផ្តើមចិញ្ចឹមបន្ថែមទាកាប៉ា ១០០ ក្បាល ក្រោយពេលចិញ្ចឹមបាន ៤ ខែ ទាមួយក្បាលៗ មានទម្ងន់ ០៣ គីឡូក្រាម ខ្ញុំលក់ក្នុងមួយគីឡូក្រាមតម្លៃ ៥៥.០០០ ដុង នៅចំណេញជាង ០៥ ​លានដុង។

ដោយឃើញលទ្ធផលពីទម្រង់នេះ បងស្វឹងបន្តចិញ្ចឹមទាលើកទី ២ រួចចំណេញជាង ០៦ ​លានដុង។ តាមបងស្វឹង​ ទម្រង់ចិញ្ចឹមទាកាប៉ាងាយអនុវត្ត ហើយសមស្របជាមួយយុវជនដែលមានបំណងផ្តើមអាជីពប៉ុន្តែខ្វះទុនផលិត។ រយៈពេលថែទាំខ្លី (ពី ០៣‑០៤ ខែ នឹងបានប្រមូលផល) ក្នុងមួយឆ្នាំៗអាចចិញ្ចឹមបានពី ០២‑០៣ លើក។

ទម្រង់ចិញ្ចឹមគោមេរបស់បងថាច់ស្វឹង នៅភូមិអូរត្រាវ។ រូបថត៖ គីមងឹង

ចលនា “រួមដំណើរជាមួយយុវជនកសាងខ្លួន កសាងអាជីព” បានគណៈប្រតិបត្តិការសម្ព័ន្ធយុវជនឃុំហ៊ីវទឺផ្សព្វផ្សាយអនុវត្តទូលំទូលាយ និងបានលើកកម្ពស់អំពីគុណភាព។ ផ្តើមពីចលនា មានទម្រង់ឆ្នើម របៀបធ្វើច្នៃប្រតិដ្ឋ រួមចំណែកកែលម្អលើកកម្ពស់ជីវភាពសម្ភារ ស្មារតីរបស់សមាជិកយុវជន។ ចលនាបានរួមចំណែកពង្រីកខ្លាំងក្លាតួនាទីស្ម័គ្រចិត្តរបស់កម្មាភិបាល សមាជិកយុវជនក្នុងការអនុវត្តបណ្តាលក្ខឋានកសាងជនបទថ្មីលើកកម្ពស់របស់មូលដ្ឋាន។

ដើម្បីអនុវត្តល្អចលនា “រួមដំណើរជាមួយយុវជនកសាងខ្លួន កសាងអាជីព” សម្ព័ន្ធយុវជនឃុំបានម្ចាស់ការពិនិត្យ ហើយក្តាប់នូវតម្រូវការ អំពីការសិក្សាវិជ្ជាជីវៈ និងការងារធ្វើរបស់សមាជិកយុវជន ផ្តើមពីនោះពិគ្រោះ រួចកំណត់ទិសដៅជូនសមាជិកយុវជន។ ទន្ទឹមនឹងនោះ កសាងបណ្តាវិធានការជាក់ស្តែង ឧបត្ថម្ភយុវជនកសាងខ្លួន បង្កើតអាជីព។ តាំងពីដើមឆ្នាំ ២០២១ មកដល់បច្ចុប្បន្ននេះ សម្ព័ន្ធយុវជនឃុំសហការជាមួយធនាគារគោលនយោបាយសង្គមស្រុករំសាយប្រាក់ទុន ៣០ លានដុងឲ្យសមាជិកម្នាក់បុលពង្រីកសេដ្ឋកិច្ច។ បច្ចុប្បន្ន សម្ព័ន្ធយុវជនឃុំកំពុងគ្រប់គ្រងក្រុមប្រិតសំចៃបុលទុន ០២ ក្រុមរបស់សមាជិក ដោយមានប្រាក់ទុនជាង ៧២៤ លានដុង។ ផ្តើមពីប្រភពទុនបុលអាទិភាពនោះ បានបង្កលក្ខណៈឧបត្ថម្ភឲ្យសមាជិកយុវជនពង្រីកការផលិត ទាញយកសក្តានុពលរបស់មូលដ្ឋាន ដើម្បីឈានឡើងរួចផុតពីភាពក្រីក្រ ធ្វើមានស្របច្បាប់។  ក្រៅពីនោះ សម្ព័ន្ធយុវជនឃុំនៅទាំងសហការជាមួយផ្នែកមានសមត្ថកិច្ចពិគ្រោះ ឧទ្ទេសនាមការងារធ្វើជូនពលករ ៦៦ នាក់។ រក្សាក្រុមសហការចិញ្ចឹមគោមេ មានសមាជិកយុវជន ១០ នាក់ចូលរួម គិតមកដល់បច្ចុប្បន្នចំនួនគោរបស់ក្រុមកើនឡើងបាន ៤៤ ក្បាល។

បងដាំងហ្វាងវ៉ូឲ្យដឹងបន្ថែម៖ ដើម្បីបន្តការរួមដំណើរជាមួយយុវជនក្នុងចលនាកសាងខ្លួន កសាងអាជីព ឧបត្ថម្ភសមាជិកយុវជនក្នុងចលនាកសាងខ្លួន បង្កើតអាជីព ឧបត្ថម្ភយុវជនពង្រីកសេដ្ឋកិច្ច នៅពេលខាងមុខនេះ សម្ព័ន្ធយុវជនឃុំហ៊ីវទឺនឹងបន្តឆ្លៀតយកបណ្តាប្រភពកម្លាំង បណ្តាគោលនយោបាយឧបត្ថម្ភ ដើម្បីជំនួយដល់សមាជិកយុវជនឲ្យឈានឡើងធ្វើមាន ស្ងើចសរសើរ លើកទឹកចិត្តទាន់ពេលបណ្តាទម្រង់គំរូឆ្នើម បង្កលក្ខណៈឲ្យសមាជិកយុវជនមានការងារធ្វើ បង្កើនប្រភពចំណូល លំនឹងជីវភាព។ ឆ្លងតាមនោះអះអាងបានតួនាទីរបស់សម្ព័ន្ធយុវជន ក្នុងសកម្មភាពរួមដំណើរជាមួយយុវជនកសាងខ្លួន កសាងអាជីព រួមចំណែកអនុវត្តសម្រេចបណ្តាគោលដៅពង្រីកសេដ្ឋកិច្ចសង្គមរបស់មូលដ្ឋាន៕

ប្រែសម្រួល៖ សុខា