ឈ្មួញជនជាតិខ្មែរមមាញឹកនឹងមុខទំនិញរដូវបុណ្យតេត

មីងគឹមធីរ៉ែន លក់បន្លែបង្ការជាច្រើនប្រភេទនៅផ្សារត្រាវិញ។

     បងគឹមថាញ់ (នៅឃុំគឹមហ្វា) ឈ្មួញលក់បន្លែ បង្ការជាច្រើនប្រភេទនៅផ្សារបាច់ដាំង បានឲ្យដឹង៖ ខ្ញុំជំនាញខាងលក់មើមខ្ទឹមក្រហម ស្ពៃក្តោប ស្ពៃផ្កា ។ល។ ជិតដល់បុណ្យតេតនេះ អតិថិជនកក់មុខទំនិញកើនឡើងច្រើនដងបើប្រៀបនឹងថ្ងៃធម្មតា។ ថ្ងៃធម្មតាខ្ញុំលក់ដុំមុខទំនិញជាច្រើនប្រភេទក្នុងមួយថ្ងៃពី 0,៥-០១ តោន។ ក្នុងអំឡុងថ្ងៃមុនបុណ្យតេតខ្ញុំលក់ដុំជូនអតិថិជនក្នុងខេត្ត និងអតិថិជននៅទីក្រុងហូជីមិញក្នុងមួយថ្ងៃពី 0៤-0៦ តោន។ បរិមាណកើនឡើង ប៉ុន្តែតម្លៃមុខទំនិញរបស់ខ្ញុំនៅរក្សាស្ថិរភាពដូចថ្ងៃធម្មតា។ តម្លៃលក់ដុំមើមខ្ទឹមក្រហមក្នុងមួយគីឡូក្រាមពី ២០ - ២២ ពាន់ដុង។ ស្ពៃក្តោបតម្លៃក្នុងមួយគីឡូក្រាមពី ៧-៩ ពាន់ដុង។

     មីងគឹមធីរ៉ែន នៅសង្កាត់លេខ ៩ ទីក្រុងត្រាវិញ បានឲ្យដឹង៖ ខ្ញុំលក់បន្លែបង្ការជាច្រើនប្រភេទនៅផ្សារត្រាវិញជាង ៣០ ឆ្នាំមកហើយ។ ខ្ញុំត្រេកអរណាស់ដោយបានអតិថិជនជាច្រើននាក់តែងមកទិញមុខទំនិញរបស់ខ្ញុំជាច្រើនឆ្នាំកន្លង។ម្ល៉ោះហើយ ទោះបី​ថ្ងៃ​ធម្មតា ឬ​រដូវបុណ្យតេតក៏ដោយ ខ្ញុំក៏រក្សា​តម្លៃ​សមរម្យ។ ខ្ញុំទិញបន្លែ ក៏ដូចជាកសិផលនៅនឹងចម្ការ ដូច្នេះហើយទើបខ្ញុំលក់តម្លៃពិសេសជូនអតិថិជន។ ក្នុងរដូវបុណ្យតេតនេះ ផ្លែល្ពៅ និងត្រសក់ក្នុងមួយគីឡូក្រាមតម្លៃពី ១០-១៣ ពាន់ដុង ដូចថ្ងៃធម្មតាដែរ។ថ្ងៃធម្មតា ទូទាត់ខ្ទង់ចំណាយរួច ខ្ញុំចំណេញក្នុងមួយថ្ងៃពី ២៥០-៣០០ ពាន់ដុង។ លុះរដូវបុណ្យ​តេតវិញ ខ្ញុំ​លក់​មុខទំនិញបាន​ច្រើន ដូច្នោះហើយប្រាក់ចំណេញក៏កើនឡើងដែរ ទូទាត់ខ្ទង់ចំណាយរួចក្នុងមួយថ្ងៃខ្ញុំចំណេញពី ៤០០-៦០០ ពាន់​ដុង។

ឈ្មួញប្រមូលទិញមុខទំនិញកសិផល។

     មិន​ត្រឹម​ឈ្មួយមមាញឹក​នឹង​ការលក់ដូរមុខទំនិញប៉ុណ្ណោះទេ អ្នកដឹក​ជញ្ជូនមុខ​ទំនិញ​តាមរយៈ​ស៊ីក្លូ​ក៏​មមាញឹក​នឹង​ភារកិច្ច​របស់ខ្លួនដែរ។ លោកមា ស៊ើងផ នៅអនុសង្កាត់លេខ ​៦ សង្កាត់លេខ ​៥ ទីក្រុង​ត្រាវិញ បាន​ឲ្យ​ដឹង៖ ជិតដល់បុណ្យ​តេត ប្រសិន​បើអ្នកមានកម្លាំងមាំមួន ឧស្សាហ៍ធ្វើការគឺមានការងារ​ធ្វើ​ពី​ម៉ោង ៣ ​ទៀប​ភ្លឺ ដល់​ម៉ោង ៦​ ល្ងាច។ ពីព្រោះឈ្មួយត្រូវការជួលដឹកជញ្ជូនមុខទំនិញពីតូបមួយទៅតូបមួយ ពីតូបទៅរថយន្ត។ល។ ចំពោះខ្ញុំវិញធ្វើល្មមកម្លាំងខ្ញុំក៏សម្រាក ម្ល៉ោះហើយ ប្រាក់ចំណូលរបស់ខ្ញុំមិនសូវបានច្រើន​បើប្រៀបនឹងយុវជន។ ​មុន​បុណ្យ​តេត ខ្ញុំ​រក​បានប្រាក់ក្នុងមួយថ្ងៃ​ពី ៤០០ - ៥០០ ពាន់​ដុង។

     ក្នុង​អំឡុង​ពេល​មុន​បុណ្យ​តេត ផ្សារ​ទាំង​អស់​ពី​ជនបទ​ដល់​ផ្សារក្រុងក្នុង​ខេត្ត​មាន​ភាពកុះករ​ជាងថ្ងៃ​ធម្មតា។ ព្រោះ​ជិតដល់​បុណ្យ​តេតប្រជាជនភាគច្រើនតែងទៅ​ផ្សារដើម្បី​ទិញមុខ​ទំនិញ​ត្រៀមទទួល​បុណ្យ​តេត។ ដូច្នោះហើយ ឈ្មួញលក់ដូរនិយាយរួម ឈ្មួញជាជនជាតិខ្មែរនិយាយដោយឡែកមានឱកាសលក់មុខទំនិញបានច្រើន ប្រាក់ចំណូលក៏កើនឡើងក្នុងរដូវបុណ្យតេតនេះដែរ៕    អត្ថបទ - រូបថត៖ សុជា