ពង្រីកប្រសិទ្ធភាពទម្រង់ "ជួយគ្នាក្នុងគ្រាមានអាសន្នអន្ធក្រ"

សមូហភាពកា​រិយាល័យរៀបរៀងកាសែតខេម​រភាសា កំពុងបង់ប្រាក់ចិញ្ចឹមជ្រូកដីសម្រាប់ជួយគ្នានៅពេលចាំបាច់។

     ការស្រឡាញ់គ្នា ជួយគ្នាដោយសុទ្ធចិត្ត ជាទង្វើជាក់ស្តែងដែលបុគ្គលិកការិយាល័យរៀបរៀងកាសែតខេមរភាសាបានធ្វើតាំងពីបំពេញការងារនៅស្ថាប័នកាសែតត្រាវិញរហូតមក។ នោះជាទង្វើដែលបងប្អូនពេញចិត្តធ្វើ និងធ្វើបានល្អជានិច្ច ។ បងប្អូនតែងចែករំលែកបទពិសោធន៍គ្នាពីការក្តាប់សារព័ត៌មាន ការថតរូប ក៏ដូចជាការងារ ប្រិតសំចៃប្រាក់ចិញ្ចឹមជ្រូកដី ហ៊ុនទុនប្រវាស់ដៃគ្នាជាដើម។ ថ្វីត្បិតតែការងារទាំងនោះមិនជាធំដុំពិតមែន ប៉ុន្តែជាទង្វើនាំមកនូវផលប្រយោជន៍ច្រើន។ ជាក់ស្តែងដូចជាហ៊ុនទុនប្រវាស់ដៃគ្នាតាមរូបភាព ម្នាក់ៗហ៊ុន ០១ លានដុងក្នុងមួយខែ សម្រាប់ឲ្យបងប្អូនម្នាក់ខ្ចីយកទៅលៃលកតាមតម្រូវការ។ ជាពិសេសគឺបងប្អូនលៃលកបានទាន់ពេលប្រសិនបើមានកំព្យូទ័រ ម៉ាស៊ីនថតរូប ខូចខាត ជាដើម ។ទន្ទឹមនឹងនោះ បងប្អូនម្នាក់ៗនៅទាំងគបប្រាក់តិចបំផុត ៥០.០០០ ដុងក្នុងមួយលើកសម្រាប់ទៅសួរសុខទុក្ខ ពេលដែលបងប្អូនក្នុងការិយាល័យ ក៏ដូចជាឪពុក ម្តាយ កូនរបស់បងប្អូនមានជំងឺតម្កាត់ ឬអាសន្នអន្ធក្រដោយចៃដន្យ។

     សមមិត្ត ស៊ើងតឹងង៉ុក អ្នកបច្ចេកទេសការិយាល័យរៀបរៀងកាសែតខេមរភាសា សមាជិកគណៈប្រតិបត្តិការសហជីពមូលដ្ឋានកាសែតត្រាវិញមានប្រសាសន៍ថា៖ ក្រៅពីការរួមចំណែកគបប្រាក់សម្រាប់បណ្តាមូលនិធិ ឧបត្ថម្ភអ្នកម្តាយវៀតណាមវីរភាព មូលនិធិទៅសួរសុខទុក្ខកម្មាភិបាល បុគ្គលិក និយោជិត មូលនិធិជំរុញការសិក្សា។ល។ ការិយាល័យរៀបរៀងកាសែតខេមរភាសានៅទាំងចូលរួមគបប្រាក់ចិញ្ចឹមជ្រូកដី គបប្រាក់ហ៊ុនទុនប្រវាស់ដៃគ្នាជាដើម។ បងប្អូនសុទ្ធសឹងតែយល់អំពីតម្លៃ ក៏ដូចជាប្រយោជន៍នៃទង្វើទាំងនេះ រួចខិតខំធ្វើឲ្យបានល្អជានិច្ច។ នោះ​ក៏​ជា​ខ្លឹមសារក៏ដូចជាទង្វើជាក់ស្តែងនៃទម្រង់ “​​ជួយ​គ្នាក្នុងគ្រាមានអាសន្នអន្ធក្រ"។ បើតាមខ្ញុំយល់ឃើញថា យើងបានជាសហជីពនឹងគ្នាហើយ យើងត្រូវយល់ដឹងសុខទុក្ខគ្នា និងជួយគ្នានៅពេលមានអាសន្នអន្ធក្រ នោះទើបឈ្មោះថាជាកល្យាណមិត្ត ក៏ដូចជាសហជីពដ៏ល្អក្នុងស្ថាប័ន។

     អ្នកកាសែត ថាច់ធីសុខា ប្រធានកា​រិយាល័យរៀបរៀងកាសែតខេម​រភាសា កាសែតត្រាវិញមានប្រសាសន៍ថា៖ ការិយាល័យរៀបរៀងកាសែតខេមរភាសា (កាសែតត្រាវិញ) បច្ចុប្បន្នមាន ប្រធានការិយាល័យម្នាក់ អ្នកយកសារព័ត៌មាន ០៣ នាក់ និងអ្នកបច្ចេកទេស ០២ នាក់។ ជាច្រើនឆ្នាំកន្លង សមូហភាពកា​រិយាល័យ តែងកំណត់ថា ក្រៅពីបំពេញភារកិច្ចមុខជំនាញបានល្អហើយ គប្បីស្រឡាញ់រាប់អានគ្នា ជួយគ្នាទៅវិញទៅមកក្នុងជីវភាពទៀតផង នេះគឺជាភារកិច្ច សំខាន់ ក៏ជាទង្វើមនុស្សធម៌ ពិតប្រាកដ។ ឆ្លងតាមរយៈនោះ បានផ្តល់ជូនបងប្អូននូវភាពកក់ក្តៅ នឹងនរចិត្តធ្វើការបានល្អ។ ផ្តើមពីទង្វើសប្បុរធម៌ទាំងនេះហើយ ការិយាល័យរៀបរៀងកាសែតខេមរភាសា បានបង្កើតទម្រង់ "ជួយគ្នាក្នុងគ្រាមានអាសន្នអន្ធក្រ" រួចបានបងប្អូនចូលរួមជ្រោមជ្រែងយ៉ាងសកម្ម។ តាមរយៈទម្រង់នេះ បងប្អូនកាន់តែស្រឡាញ់រាប់អានគ្នា មានភាពស្និទ្ធស្នាលជាមួយគ្នា ចូលរួមបំពេញភារកិច្ចនយោបាយនៅស្ថាប័នឲ្យបានល្អជាងទៀត ។

     ដើម្បីបន្តការពង្រីកលទ្ធផលដែលសម្រេចបានក្នុងការអនុវត្តន៍ទម្រង់ “ជួយគ្នាក្នុងគ្រាមានអាសន្នអន្ធក្រ” អ្នកកាសែត ស៊ើងហុង អគ្គនិពន្ធនាយករងកាសែតត្រាវិញ មានប្រសាសន៍ថា៖ ដូចយើងបានដឹងស្រាប់ហើយថា អ្នកកាសែតដូចជាយើងខ្ញុំ តែងមមាញឹកក្នុងការងារសារព័ត៌មានទាន់ហេតុការណ៍ ។ ការងារធ្វើថ្ងៃនេះតភ្ជាប់ទៅនឹងការងារថ្ងៃស្អែក។ បងប្អូនម្នាក់ៗនរណាក៏ខំធ្វើការឲ្យទាន់ពេល តាមតួនាទី ភារកិច្ចដែលបានប្រគល់ជូន ។ ហេតុនោះ ដើម្បីជំរុញទឹកចិត្តបងប្អូនខិតខំធ្វើការងារមុខជំនាញនៅស្ថាប័នឲ្យបានល្អ គណៈរៀបរៀងកាសែតត្រាវិញចង្អុលការថ្នាក់ដឹកនាំបណ្តាការិយល័យនៃស្ថាប័នកាសែតត្រាវិញនិយាយរួម កា​រិយាល័យរៀបរៀងកាសែតខេម​រភាសា និយាយដោយឡែក បន្តការពង្រីកប្រវេណីសាមគ្គី ជួយគ្នាទៅវិញទៅមក ដើម្បីបង្កើនគុណភាព ប្រសិទ្ធភាពការងារផង ដើម្បីបង្កើនកិត្តិស័ព្ទសមូហភាពសាមគ្គី រឹងមាំផង រួមចំណែកអនុវត្តល្អការងារ ដែលគណៈរៀបរៀងកាសែតត្រាវិញបានប្រគល់ជូន។ ចំពោះកា​រិយាល័យរៀបរៀងកាសែតខេម​រភាសាវិញត្រូវបន្តការរក្សាខ្ជាប់ និងពង្រីក ប្រសិទ្ធភាពទម្រង់ “ជួយគ្នាក្នុងគ្រាមានអាសន្នអន្ធក្រ”។

     ផ្តើមពីទម្រង់ “ជួយគ្នាក្នុងគ្រាមានអាសន្នអន្ធក្រ” ជារៀងរាល់ឆ្នាំ ក្នុងឱកាសបុណ្យចូលឆ្នាំថ្មីប្រពៃណីខ្មែរ បុណ្យសែនដូនតា អំណរទិវាសារព័ត៌មានបដិវត្តន៍វៀតណាម ២១ មិថុនា។ល។ បងប្អូនការិយាល័យរៀបរៀងកាសែតខេមរភាសា តែងគបប្រាក់គ្នាពី ២០០ - ៣០០ ពាន់ដុងសម្រាប់ទៅសួរសុខទុក្ខ និងជូនអំណោយដល់សហជីពចូលនិវត្តន៍ ដែលធ្លាប់បំពេញការងារនៅការិយាល័យរៀបរៀងកាសែតខេមរភាសា (កាសែតត្រាវិញ)។

     ធ្វើការនៅទីណាក៏ដូចទីណាដែរ ពេល សមូហភាពតែងស្រឡាញរាប់អានគ្នាដោយសុទ្ធចិត្ត តែងផ្តល់នូវភាពកក់ក្ដៅដល់គ្នានឹងគ្នា ជួយជំរុញទឹកចិត្តគ្នា ទោះបីការងារនៅទីនោះមានការលំបាកយ៉ាងណាក្ដី ក៏សមូហភាពនោះធ្វើសម្រេចជោគជ័យដែរ។ ជាពិសេសគឺធ្វើសម្រេចការងារនោះដោយរីករាយ និងសុភមង្គល។ ដូច្នេះហើយ ជាច្រើនឆ្នាំកន្លង កា​រិយាល័យរៀបរៀងកាសែតខេម​រភាសា តែងអនុវត្តមានប្រសិទ្ធភាពទម្រង់ “ជួយគ្នាក្នុងគ្រាមានអាសន្នអន្ធក្រ”។ ផ្តើមពីទម្រង់នេះ សមូហភាពការរិយាល័យបាន និងកំពុង រួមគ្នាជម្នះរាល់ការលំបាកក្នុងជីវភាព ដើម្បីអនុវត្តសម្រេចជោគជ័យ ភារកិច្ចដែលថ្នាក់លើ ប្រគល់ជូន។ អាចអះអាងបានថា អង្គភាពស្ថាប័នកាសែតត្រាវិញនិយាយរួម ការិយាល័យរៀបរៀងកាសែតខេមរភាសា និយាយដោយឡែក ជាគ្រួសារទីពីររបស់សមូហភាពយើង ជាទីតាំងមិនត្រឹមតែសម្រាប់យើងធ្វើការស្ថិរភាពប៉ុណ្ណោះទេ នៅទាំងជាទីតាំងដែលមានកល្យាណមិត្តរួមអាជីព តែងផ្តល់ក្តីស្រឡាញ់ ផ្តល់ភាពកក់ក្តៅ ដើម្បីរួមគ្នាជម្នះការលំបាក ធ្វើការងារមុខជំនាញ បានល្អ រួម​ចំណែកក្នុងការ​អភិវឌ្ឍន៍​សារព័ត៌មាន​បដិវត្តន៍​វៀតណាម៕

អត្ថបទ‑រូបថត៖ សុជា