អានិសង្សបាយបាត្រ

១/  បាយបាត្របត់បែនបានបរិបូណ៌  

បាយបាត្រពេញពោររសឈ្ងុយឈ្ងប់

បាយបាត្របើបាននែបនិត្យស៊ប់   

បាយបាត្រជួយសព្វគ្រប់កិច្ចការ ។

២/ បាយបាត្រជួយឲ្យចេះកាន់ខ្នាត     

បាយបាត្រចេះឆ្លាក់ក្បាច់រចនា

បាយបាត្រឲ្យចេះអានសាស្ត្រា       

បាយបាត្រចេះចារអក្សរសាស្ត្រ ។

៣/បាយបាត្រជាក់ជាវេជ្ជបណ្ឌិត        

បាយបាត្រល្អពិតចេះកាព្យសាស្ត្រ

បាយបាត្រជួយជាកវីច្បាស់           

បាយបាត្រខ្លះទៀតជាមន្ត្រី ។

៤/  បាយបាត្រក្លាយជាវិស្វករ              

បាយបាត្រសាទរគ្រប់ទិសទី

បាយបាត្របើឆ្ងាញ់ៗគ្មានពីរ         

បាយបាត្រលកលៃចេះកាមរ៉ា ។  (១)

៥/  បាយបាត្រក្លាយជាអ្នកមានបុណ្យ   

បាយបាត្រសែកមន្តប្រោសសត្តា

បាយបាត្រឲ្យទៅជាអាចារ្យ           

បាយបាត្រទេសនាពុទ្ធឱវាទ ។

៦/  បាយបាត្របុណ្យដារការតូចធំ      

បាយបាត្រចេះផ្គុំគ្មានវិបត្តិ

បាយបាត្រឲ្យជាគ្រូហ្វឹកហាត់        

បាយបាត្រក្លាយជាអាចារ្យខ្មោច ។

៧/  បាយបាត្រឲ្យចេះកាំព្យូទ័រ              

បាយបាត្រពេញពោរឧត្ដមភោជន៍

បាយបាត្រគ្រប់កាលមានប្រយោជន៍  

បាយបាត្រយ៉ាងហោចចេះឧត្តមង្គ ។

៨/  បាយបាត្រ យំ - កិញ្ច ឧទ្ទិសផល    

បាយបាត្រផ្ដល់បុណ្យជាកម្លាំង

ដល់ញាតិចាកឋានបានសម្រាំង    

ផុតគ្រោះទុក្ខំប្រាកដស្ដែង... ។

៩/  ហេតុច្នេះ លោកោ ឱលោកើយ      

ទោះម្ដេចម្ដារឡើយកុំខែងរ៉ែង

កុំភ្លេចបាយបាត្រណ៎ាប្រស្ដែង        

បាយបាត្រនេះឯងប្រសើរហោង ៕

            (គឹម ជុំ  -  ០៦/0២/២០២៥ )

ប្រគេននិងជូនសញ្ញាបត្រថ្នាក់ពុទ្ធិកមធ្យមសិក្សាបឋមភូមិ។ រូបថត៖ សុជា

បេក្ខសិស្សកំពុងប្រឡងវិញ្ញាសាតែងសេចក្តី។ រូបថត៖ រតនា

​

អ្នកស្រីគាងធីមិញង្វៀក អនុប្រធានគណៈឃោសនាអប់រំ និងប្រជាចលនានៃគណៈកម្មាធិការបក្សខេត្តប្រគេនកម្រងផ្កាសម័យប្រឡងសម្រេចជោគជ័យនារាត្រីប្រកាសលទ្ធផល។ រូបថត៖ សុជា

              អាសូរគ្រូខ្ញុំ!

                                        ដោយ៖ ថាច់សុភី

១-ពេលរៀនស្តាប់គ្រូថ្ងូររងំ             

ឆ្នាំនេះសិស្សខ្ញុំអន់ខ្សោយណាស់

ខ្លួនខ្មែរតែអានខ្មែរមិនច្បាស់     

ខុសសូរពាក្យខ្លះខ្យល់ជាខ្យយ។

២-ចំណោទចំណេះកេះខ្វើកៗ       

របេះរបើកកាន់តែថយ

អណ្តាតងាប់ស្តូកអានថាដយ    

ផលសោះថាផយខុសតម្រា។

៣-សរសេរមួយល្បះខុសពីរ បី      

ខ្មែរឬបាលីគ្រប់បញ្ហា

គ្រូណែប្រែប្រាប់សព្ទខ្លឹមសារ      

តែសែនអនិច្ចាស្តារមិនឡើង។

៤-សិស្សឆ្លាតសិស្សខ្សោយលយលឹបលៀន   

ខ្លះប្រិតប្រឹងរៀន ខ្លះចចើង

ខ្លះឫកសុភាព ខ្លះឆ្មៃឆ្មើង             

មិនព្រមឡើងទ្រើងនៅតែខ្វៀន។

៥-ខ្លះខំរៀនដែរ រៀនមិនចូល        

ខ្លះជាប់ត្រកូលចូលមិនរៀន

ខ្លះមូរកន្ទបតែលបញៀន            

" ឡៀងហ្វឹង" រុករានទាំងយប់ថ្ងៃ។

៦-តែពេលប្រឡងឆ្លងផុតគ្រោះ      

មានកេរ្តិ៍ថ្កើងយសខ្ពស់ឡើងថ្លៃ

អួតកូនពូជឪប្រាជ្ញប្រុះក្រៃ            

ភ្លេចអ្នកដឹកដៃនាំផ្លូវល្អ។

៧-ពេលធ្លាក់ដាក់ទោសមកឱ្យគ្រូ   

មិនចេះគិតគូរជួយផ្សំស្ល

បង្រៀនមិនកើតទើបវណ្ឌក        

កូនចៅក្រីក្រខ្សត់ចំណេះ។

៨-អាសូរគ្រូខ្ញុំ!   ខំប្រឹងណាស់         

យប់ថ្ងៃជម្នះការចាក់ស្រេះ

ខំចង់ឱ្យសិស្សបានចាំចេះ             

តែបានត្រឹមផេះគេនិន្ទា។ ...! !

                  វត្តកំពង់ ០៩-កុម្ភៈ-២០២៥

រាត្រីប្រកាសលទ្ធផល។ រូបថត៖ រតនា