ជូនប័ណ្ណសរសើរ ១៨ ច្បាប់ដល់សមូហភាព បុគ្គល “មានស្នាព្រះហស្តសម្រេចភារកិច្ចសមាគមឆ្នាំ ២០២០”

កាលពីព្រឹកថ្ងៃទី ២៨ ធ្នូ សមាគមព្រះសង្ឃសាមគ្គីស្នេហាជាតិខេត្ត ចាត់តាំងសន្និបាតលើកទី ០៣ អាណត្តិកាលទី ០៧ (២០១៨‑២០២៣) ដើម្បីបូកសរុបលទ្ធផលសកម្មភាពឆ្នាំ ២០២០ និងផ្សព្វផ្សាយភារកិច្ចសកម្មភាពឆ្នាំ ២០២១ ព្រះឧបជ្ឈាយ៍ ថាច់សុខសាន្ត ប្រធានគណៈអភិបាលពុទ្ធសាសនាវៀតណាមខេត្ត​ប្រធានសមាគមព្រះសង្ឃសាមគ្គីស្នេហាជាតិខេត្តធ្វើជាអធិបតីអង្គសន្និបាត។ និមន្ត-អញ្ជើញចូលរួមអង្គសន្និបាតមាន៖ លោកង្វៀងវ៉ាំងត្រៀក សមាជិកអចិន្ត្រៃយ៍​នៃគណៈកម្មាធិការបក្សខេត្ត  ប្រធានគណៈកម្មាធិការរណសិរ្សមាតុភូមិវៀតណាមខេត្ត ​លោកង្វៀងក្វីនធៀង សមាជិកគណៈប្រតិបត្តិការបក្សខេត្ត អនុប្រធានគណៈកម្មាធិការប្រជាជនខេត្ត តំណាងបណ្តាមន្ទីរស្ថាប័នខេត្តនិងព្រះឧបជ្ឈាយ៍ ព្រះថេរានុត្ថេរជាច្រើនព្រះអង្គតំណាងឲ្យសមាគមព្រះសង្ឃសាមគ្គីស្នេហាជាតិបណ្តាស្រុក ក្រុងក្នុងខេត្ត ។

លោកង្វៀងវ៉ាំងត្រៀកប្រគេនប័ណ្ណសរសើរដល់សមូហភាពបុគ្គល។

ឆ្នាំ ២០២០ ទន្ទឹមនឹងចលនាព្រះសង្ឃ​អនុវត្តល្អកិច្ចការពុទ្ធសាសនា គ្រប់គ្រងវិស័យអប់រំពុទ្ធិកសិក្សានៅភូមិសាស្ត្រខេត្ត សមាគមព្រះសង្ឃសាមគ្គីស្នេហាជាតិគ្រប់លំដាប់ថ្នាក់ក្នុងខេត្ត នៅទាំងចលនាព្រះសង្ឃ ពុទ្ធបរិស័ទចូលរួមគបវាល់ទឹកប្រាក់ជាង ២៥ ពាន់លានដុងដើម្បីរួមចំណែកជាមួយរដ្ឋអំណាច គណៈកម្មាធិការរណសិរ្សមាតុភូមិវៀតណាមគ្រប់លំដាប់ថ្នាក់ក្នុងខេត្តអនុវត្តការងារសុខុមាលភាពសង្គមដូចជា៖ កសាងផ្ទះមហាសាមគ្គី ឧបត្ថម្ភការងារបង្ការ ទប់ស្កាត់អាសន្នរោគកូវីដ‑១៩ ឧបត្ថម្ភប្រជាជនភូមិភាគកណ្តាលដែលជះឥទ្ធិពលដោយគ្រោះធម្មជាតិទឹកជំនន់ ឧបត្ថម្ភព្រឹទ្ធាចារ្យក្រីក្ររស់នៅម្នាក់ឯង សួរសុខទុក្ខ ជូនអំណោយអ្នកជំងឺក្រីក្រ។ល។

ជាមួយនឹងគោលលំនាំ “សាសនា‑ជនជាតិ‑សង្គមនិយម” សមាគមព្រះសង្ឃសាមគ្គីស្នេហាជាតិខេត្តបានដាក់ចេញទិសដៅភារកិច្ចជាក់ស្តែងក្នុងឆ្នាំ ២០២១ ដើម្បីបន្តកិច្ចសហការជាមួយរដ្ឋអំណាច អង្គការមហាជនគ្រប់លំដាប់ថ្នាក់អនុវត្តល្អបណ្តាចលនាប្រឡងប្រណាំងស្នេហាជាតិនៅមូលដ្ឋាន។

ក្នុងឱកាសនេះដែរគណៈកម្មាធិការរណសិរ្សមាតុភូមិវៀតណាមខេត្តប្រគេនប័ណ្ណសរសើរដល់សមូហភាព ៤ កន្លែង និងបុគ្គល ១២ អង្គ មានស្នាព្រះហស្តសម្រេចភារកិច្ចរបស់សមាគមឆ្នាំ ២០២០៕                                                            

ដំណឹង‑រូបថត៖ សុជា