កសិករសួរវិស្វករឆើ្លយ

ចិញ្ចឹមចង្រិតពាណិជ្ជផលផ្តល់សេដ្ឋកិច្ចខ្ពស់ និងមានកន្លែងលក់ដាច់នៅតាមបណ្តាទីក្រុងធំៗ។ ចង្រិតពាណិជ្ជផល ភាគច្រើនគឺពូជចង្រិតខ្មៅ។ ដើម្បីមានប្រភពពូជល្អ ធំធាត់រហ័សទាមទារត្រូវមានប្រភពពូជចង្រិតមេមានគ្រប់សម្បទា ដើម្បីជ្រើសរើសទុកសម្រាប់បន្តពូជ។ ខាងក្រោមនេះ គឺជាបច្ចេកទេសមួយចំនួនក្នុងការជ្រើសរើសចង្រិតទុកពូជ។

អាយុកាលរបស់ចង្រិតខ្លី​ ដំណាក់កាលធំនិងកើតកូនពី ៤៥-៦០ ថ្ងៃ។ ចង្រិតសកចំនួន ០៣ លើក ពេលមានអាយុពី ៤៥-៥០ ថ្ងៃ ចង្រិតចាប់ផ្តើមសកលើកទី ០៣។ ពេលនេះ ចង្រិតឈ្មោលមានអាការសាហាវ វាជល់គ្នា ដើម្បីដណ្តើមចង្រិតមេរហូតដល់ងាប់។ ចង្រិតមេក្រោយពេលដោលឈ្មោលរួចវានឹងកើតកូនជាបន្តបន្ទាប់ក្នុងរង្វង់ពី ២០-២៥ ថ្ងៃ ក្នុងមួយក្បាលលេចពី ៦០០-៧០០ ពង។ ពេលលេចពងស៊ុតរួចវានឹងងាប់។

របៀបធ្វើឲ្យចង្រិតពង៖

ពេលវេលាចង្រិតលេចពង៖ ដំបូងបង្អស់ គឺយោងតាមសម្លេងរងាវរបស់ចង្រិតឈ្មោល។ ក្រោយពេលចង្រិតឈ្មោលរងាវពី ០២-០៣ ថ្ងៃ ចង្រិតមេចាប់ផ្ដើមដោយឈ្មោល។ ខណៈនេះ គប្បីបម្រុងកញ្ច្រែងសម្រាប់ចង្រិតពងដោយដាក់ក្នុងធុង។ ក្រៅពីនោះ ពិនិត្យមើលគូថចង្រិតមេ បើឃើញមានចេញទឹកពណ៌សនោះគឺដល់ពេលចង្រិតពង។ ក្នុងរយៈពេលពី ០១-០២ ថ្ងៃដំបូង ចង្រិតពងរាត់រាយ ពងតូចៗវែងដូចជា៖ គ្រាប់អង្ករពណ៌សល្អក់ ព្រោះចង្រិតមិនសូវបានដោលឈ្មោល ហេតុនោះហើយអត្រាភ្ញាស់ទាប។

ចាប់ពីថ្ងៃទី ០៣ ឡើងទៅ ចង្រិតពងសាជាថ្មីម្ដងទៀត រួចផ្អាប់ពងហើយញាស់កូន។ ចង្រិតពងនៅពេលយប់ ហេតុនោះហើយ ពេលដាក់កញ្ច្រែងសម្រាប់ចង្រិតពងនៅវេលាម៉ោង ៦ ល្ងាច។ ដល់ពេលព្រឹកនៃថ្ងៃបន្ទាប់ប្រមូលកញ្ច្រែងចេញរួចបង់លេខរៀង។

ផ្អាប់ពងចង្រិត៖ ក្រោយពេលប្រមូលកញ្ច្រែងរួចយកមកតម្រៀបក្នុងធុងផ្អាប់តាមលេខរៀងតាមលំដាប់ ហើយសរសេរថ្ងៃខែ។ ក្នុងមួយថ្ងៃយកកញ្ច្រែងពងចេញក្រៅរួចយកធុងបាញ់ទឹកផ្សើមម្ដងក្នុងកញ្ច្រែងចំនួនពី ០២-០៣ លើក ដើម្បីរក្សាជាតិសំណើម។

យកចិត្តទុកដាក់៖ មិនត្រូវបាញ់ទឹកច្រើនពេក ងាយធ្វើឲ្យពងស្អុយ (ពេលពងស្អុយនឹងប្រែជាពណ៌ត្នោតឬខ្មៅ)។ ប្រសិនបើខ្វះទឹក ហើយដីត្រូវស្ងួត ពងចង្រិតក៏មិនញាស់។

កម្រិតអង្សាសមស្របក្នុងបន្ទប់សម្រាប់ផ្អាប់ពងចង្រិតពី ២៤-២៥ អង្សា។ ថែទាំក្នុងរយៈពេលពី ០៧-១០ ថ្ងៃពងចង្រិតចាប់ផ្តើមញាស់បើអាកាសធាតុត្រជាក់ពី ១៥-២០ ថ្ងៃ។ បើរាប់ដល់ថ្ងៃញាស់(គឺមើលតាមលេខរៀងនិងថ្ងៃខែដែលបានកត់ត្រាលើកញ្ច្រែង) យកកញ្ច្រែងទៅដាក់ក្នុងធុងចិញ្ចឹមផ្សេង រៀបពី ០១-០៣ កញ្ច្រែង។ រយៈពេលពងចង្រិតញាស់អស់ក្នុងកញ្ច្រែងពី ០៥-០៧ ថ្ងៃ ញាស់ច្រើនបំផុតនៅថ្ងៃទី ០៣។

ផ្លាស់ដាក់ធុងថ្មី៖ បើឃើញចំនួនចង្រិតញាស់ច្រើន ត្រូវដាក់ទៅធុងផ្សេង រំលែកកម្រិតចិញ្ចឹម យកកូនដែលញាស់មុននិងក្រោយ ដើម្បីធានាស្មើភាគគ្នា ជៀសវាងកុំឲ្យថ្ងៃក្រោយកូនធំឡើងដណ្តើមចំណីចង្រិតដែលនៅតូច។ មិនត្រូវយកដៃចាប់ចង្រិត អាចនឹងធ្វើឲ្យកូនចង្រិតងាប់។ ដាក់ផ្អៀងធុងចិញ្ចឹមនៅជ្រុងណាមួយដើម្បីឲ្យចង្រិតប្រមូលចុះមួយជ្រុងខាងក្រោម ហើយពេលនោះ កូនចង្រិតធំៗនឹងឡើងពីលើ  រួចយកក្រដាស carton មួយផ្ទាំងមកកៀរស្រាលៗដាក់ទៅធុងផ្សេងវិញ៕                                                 

ប្រែសម្រួល៖ ថាច់ហៀង